Babae Jack Alvarez

God gave Mary the opportunity to shine, Let that same opportunity be given To women of our time. Sa paraiso ng Eden unang nasilayan ang nakakubling Kahulugan ng kanyang larawan Hinugot sa kaliwang tadyang, nililok ng Bathala Bilang kapares ni Adan. Sa sabsaban ng Bethlehem unang naaninag ang dakilang Pahiwatig ng kanyang mukha Na tanging pinagkalooban ng isang pag-ibig sa sanlibutan, Sinasamba sa dambana. Ang sigaw ng rebelyon ni Gabriela, maulinigan ang tinig Ng bantayog sa kagitingan Nang sumapit ang karimlan sa ilalim ng mababangis na leon Dito sa kapuluan. Sa kauna-unahang pagkakataon, may babaeng gabay Sa EDSA Rebolusyon, Labanan ang diktador na pumuksa sa kalayaang May ginintuang layon. Ang pagtatag ng tagumpay, walang matipunong Adan At walang mahinang Eba Sa trono ng paraiso, sa papel ng katungkulan, Sa mukha ng baraha. Kundi ang pagbabata hanggang kalbaryo, ang pagkanta Ng kanyang sariling awit, Ang pagtayo ng mga adhikain kahit na Ang tadhana’y mapagkait. SALAMAT Michelle Constantino Sa panahong ako�y litong-lito Salita mo�y narito Sa puso kong hindi mapakali Pinatunayan mong hindi ako bigo Sa oras ng kalabuan ng aking buhay Ikaw ang aking naasahan Sa aking kasiyahan Alam kong ikaw ay nariyan Sa maikling panahon Madali mong naahon Ang lunod kong buhay Upang maging makulay Sa iyo ko naramdaman Ang tunay na pagkakaibigan Na hindi ko ipagpapapalit Kahit isang saglit Kung hihiling pa ako sa Kanya Ng isang kaibigang nais kong makilala Sana�y isang taong kagaya mo Na hindi magsasawang tumulong sa tulad ko. aKinG pAg-IbiG May Suñiga Paano matutukoy and tanging pag-ibig? Kung wala itong katulad, sukat, at bilang Walang dami ng salita ang makakalarawan Walang una, huli, simula, at hangganan... Baon ang luha mo sa aking pag-alis Katinuan at lakas unti-unting lumipad Isinuko ng pagod, manhid sa sakit Isinuka ng kaluluwa, mukmok sa isang tabi Kahit si kalungkutan hindi nakatiis Sa isip ko'ng puro larawan mo'ng nakasabit. Wala na nga ba'ng pangarap o ni isa mang sumpa? Tuluyan ng bang nilimot ng pusong inulila? Wala na bang natira, nilamon ng nakaraan Kundi mumo sa hapag ng ating pinagsaluhan? Wala na ba'ng pag-ibig na tangi at lubos? Sa saya nagtampisaw, panahon ang umukit Noo'y parang arnibal na walang kasing tamis Ngayo'y s'ya namang pait nang sinunog ng galit. Ngayon ako'y nakatunganga, ako at aking puso Hinubog at pinalago ng tanging pag-ibig, Isinilid sa alaala mong selyado ng halik, Sa pinakamamahal kong, iba na'ng nagmamay-ari. Ideyalismo Fermin S. Salvador Mag-alok ka ng ideyalismo, May mga makikinig sa iyo Pagkat may nangangarap pang tao Na di bihag ng materyalismo. Sabihing inyong ipaglalaban Ang kalayaan at katarungan, Sila'y magsisipagtaas-kamay Tanda ng pag-ayon at pagdamay. Mag-alok ka ng ideyalismo, Hindi masasayang ang pagod mo Pagkat hindi ang lahat sa mundo Ang hanap ay bayad at purbetso. Sabihing inyong itataguyod Ang kapakanan at pagbubuklod Ng mga naapi at nalimot, Sila'y nahahandang makisangkot. Mag-alok ka ng ideyalismo Di para maging bida't pamoso Makatatagpo ka ng katoto Na tapat kahit pa magdelubyo. Sabihing inyong ipapahayag Ang paniniwala at pagmulat At mithi nang ang baya'y umunlad, Puso nila'y sasamang maglayag. Mag-alok ka ng ideyalismo, Hinihintay ka ng libo-libo Na ang hangarin ay pagbabago Na di huwad o 'sang balatkayo. --- Mag-alok ka ng ideyalismo Nang di nagtatanong kung magkano Ganito man ang sagot sa iyo: "Ideyalismo't tula lang ito." ang hindi pagtula Mark Alvin Ligaya naisip ko ngayon na hindi tumula, yung para bang sumulat ng tula na hindi naman talaga tula yung kabaligtaran ng tula kung may ganoon man walang pinanggagalingan na apoy sa puso o isip ngunit may pinapaksa sapagkat hindi naman laging may tema ang isang magandang tula minsan ang mga magagandang tula ay punit- punit lasog- lasog na nagbibigay dito ng sinasadyang karakter basag, sabog, gulanit mga larawang pasulpot-sulpot lumulutang na mga kalaliman at kababawang minsan ay di maintindihan kahit ang hindi pagkaintindi kung minsan ang nakapagpapahatid ng nais maintindihan Makakain Pag Malinis Fermin S. Salvador Makakain pag malinis Ang bibingkang puro latik, At kahit ubod nang lagkit, Makakain pag malinis. Makakain pag malinis Ang monay na sobrang taba Na tila ba ay pasadya Sa bungangang dambuhala. Makakain pag malinis Ang mansanas na manipis, Buto sa gitnang maliit, Makakain pag malinis. Makakain pag malinis Ang ilang piling bulaklak Kahit tuyot na o mamad Pag nahugasa'y may sarap. Sa Guhit Ng Palad Jack Alvarez Hawak ng mga daliri ang limguhit mga linyang kumakanta sa awit ng palad at naglalahad… mga himnong alibugha sa ritmo, mga agunyas sa sementeryo na huwad ang isinasaad sa tunay na kulay. i. ‘Sandangkal na nagtutulak sukatin ang kapwa humihinga sa hangin ng daigdig, kahit tubig… ni munting tulo ay hindi nagwisik sa kuko ng nagmamalimos ng piso dahil hawak ng uwak. ii. Ang walang sawang pinalalakbay ang panulat sa mukha ng buwan at balat ng libro, may konsepto… karaniwa’y lumalabis pati ibang planeta ay agawin sa kamay Niya- ang lumikha na Bathala. iii. Laging nagnanasa’t naghahangad ng palakpak, ng ginintuang gawad sa larangan at karunungan… pangarap lagi ang mga tropeo, ang mga pilak na uniberso ng mapanglaw na araw. iv. Mga daliring hawak ay bakal na rehas tila mga kamay ay naaagnas sa sala na nagawa… di na mabilang ang paglubog ng taon pati ang pagluha maghapon ng linyang may utang. v. Hinlalaki’t hintuturo’y kalansing ng pera ang sinusunson sa bawat eskina ay kinakalahig ang daigdig… inangkin ang lahat maabot ng tanaw kamkamin ang yaman ang siyang pananaw upang maghari ang daliri. vi. Balat-kayong pagkurus sa harap ng rebulto ni Jose, ni Maria, pati kay Kristo sa dambana ng lupa… pinahahalik ang tuhod na marumi, dinadala ang putik na kayrami sa drama ng mata. Kukumpas sa wala ang dipa ng kanyang paghinga at pagkanta sa koro ng mundo… bagay lamang na itiklop, putulin sa hanay ng mga buhangin na umaawit sa limguhit na totoo ang liriko.   R i t w a l Ezzard R. Gilbang Isinayaw ng apoy ang handog; at ang abong ay tiningala sa paglipad. Kumalas sa kamay ng bundok at humalik sa ulap. Humal sa lupa ang pagpadyak, kasabay ng agong at kitubeng ang bulong ng mga dalanging ang hasik ng langit ay magsaboy. Sumaklob ang dagundong nang magsukob ang hiyaw at hugong. At nagtampisaw ang mga bul-ul at kabunyan sa saliw at halimuyak ng kanyaw. Nagbunyi. Nagbunyi sa yakap ng lamig at halik ng patak ang mga punong dati’y lupasay. Ngunit, ayaw nang humupa ang pag-indak. Hanggang mangilabot ang balat ng lupa at ang labing dati’y bitak ay namamad. Kailan dudungaw ang araw? Kailan matatapos ang dung-aw ng ulap? Nanoot ang aniw ng ginaw sa laman at lamad. At ang ilog ay naglungad ng banlik at burak; nagdurugong luwad. Na umagos sa pagitan ng mga ugat ng bundok. Sa ibaba, ang mga abung-abong na nakahilig sa dahilig ay nangatal, Habang tinitingala ang malalaking tipak Ng mga batong nagsimulang sumayaw. Gaano Katagal Ang Ngayon? Mark Alvin Ligaya Ang ngayon Kasalukuyang naiiwanan ang nakaraan Hinahabol ang kasalukuyan Ang ngayon Kahapon ay kinabukasan Bukas ay kahapon Kanina ay mamaya Mamaya ay kanina Ang ngayon Umiiral nga ba ang ngayon? Sinasabi ng ilan Na nabubuhay sila sa ngayon Gaano katagal ang ngayon? Nasusukat nga ba ang panahon? Nahahawakan ba ang panahon? Kung ako ay mabubuhay sa ngayon Bukas ay nabuhay ako sa kahapon Kahapon ay nabuhay ako sa kinabukasan Ang ngayon Gaano katagal ang ngayon? payaso Maria Isabel Arellano puro kalokoha't kasiyahan iyan daw ang iyong nalalaman lagi ka ngang pinagtatawanan at isinasama sa mga umpukan ngiti mo ay kinasasabikan kuwento mo ay kinatutuwaan para kang payaso na batikan patawa mo ay hinahangaan kapag sila'y apaw sa kalungkutan ikaw ang laging nilalapitan lagi mo raw kasing nababawasan ang lumbay ng mga kaibigan pero 'di nila alam, ito'y maskara lamang dahil ang masaklap na katotohanan --- puso mo'y nagdurugo, lubhang sugatan at wala kang magawa, kundi sarilinin ang nararamdaman.